Богослужебные тексты для общего народного пения: Неделя о БЛУДНОМ СЫНЕ, глас 1 (15-16 февраля 2014)

Размещаем текст для общего народного пения к субботней всенощной и воскресной литургии

Притча о блудном сыне

БЛАЖЕН МУЖ
Блажен муж, иже не иде на совет нечестивых. Аллилуиа, Аллилуиа, Аллилуиа.
Яко весть Господь путь праведных и путь нечестивых погибнет. Аллилуиа (трижды).
Работайте Господеви со страхом и радуйтеся Ему с трепетом. Аллилуиа (трижды).
Блажени вси надеющиеся нань. Аллилуиа (трижды).
Воскресни, Господи, спаси мя, Боже мой. Аллилуиа (трижды).
Господне есть спасение и на людех Твоих благословение Твое. Аллилуиа (трижды).
Слава, И ныне: Аллилуиа (трижды)
Аллилуиа, Аллилуиа, Аллилуиа. Слава Тебе, Боже (трижды)

СТИХИРЫ на Господи воззвах:
Господи, воззвах к Тебе, услыши мя. / Услыши мя, Господи. Господи, воззвах к Тебе, услыши мя: / вонми гласу моления моего, / внегда воззвати ми к Тебе. / Услыши мя, Господи. Да исправится молитва моя, / яко кадило пред Тобою, / воздеяние руку моею / – жертва вечерняя. / Услыши мя, Господи. Изведи из темницы душу мою, исповедатися имени Твоему.
[Стихиры ВОСКРЕСНЫЕ]:
Вече́рния на́ша моли́твы/ приими́, Святы́й Го́споди,/ и пода́ждь нам оставле́ние грехо́в,/ я́ко Еди́н еси́// явле́й в ми́ре Воскресе́ние.
Мене ждут праведницы, дондеже воздаси мне.
Обыди́те лю́дие Сио́н,/ и обыми́те Его́,/ и дади́те сла́ву в нем Воскре́сшему из ме́ртвых:/ я́ко Той есть Бог наш,// Избавле́й нас от беззако́ний на́ших.
Из глубины воззвах к Тебе Господи, Господи, услыши глас мой.
Прииди́те лю́дие,/ воспои́м, и поклони́мся Христу́,/ сла́вяще Его́ из ме́ртвых Воскресе́ние:/ я́ко Той есть Бог наш,/ от пре́лести вра́жия мир Избавле́й.
Да будут уши Твои, внемлюще гласу моления моего.
Весели́теся Небеса́,/ воструби́те основа́ния земли́,/ возопи́йте го́ры весе́лие:/ се бо Емману́ил грехи́ на́ша на Кресте́ пригвозди́,/ и живо́т дая́й, смерть умертви́,// Ада́ма Воскреси́вый, я́ко Человеколю́бец.
Глас 1: Аще беззакония назриши, Господи, Господи, кто постоит; / яко у Тебе очищение есть. [Стихи́ры Постной Трио́ди]:
В безгре́шную страну́ и живо́тную вве́рихся,/ посе́яв грех, серпо́м пожа́в кла́сы ле́ности,/ и рукоя́тием связа́в дея́ний мои́х снопы́,/ я́же и постла́х не на гумне́ покая́ния:/ но молю́ Тя преве́чнаго де́лателя на́шего Бо́га,/ ве́тром Твоего́ любоблагоутро́бия разве́й пле́ву дел мои́х,/ и пшени́цу даждь души́ мое́й оставле́ние,// в небе́сную Твою́ затворя́я мя жи́тницу, и спаси́ мя.
Имене ради Твоего потерпех Тя, Господи, потерпе душа моя в слово Твое, / упова душа моя на Господа.
В безгре́шную страну́ и живо́тную вве́рихся,/ посе́яв грех, серпо́м пожа́в кла́сы ле́ности,/ и рукоя́тием связа́в дея́ний мои́х снопы́,/ я́же и постла́х не на гумне́ покая́ния:/ но молю́ Тя преве́чнаго де́лателя на́шего Бо́га,/ ве́тром Твоего́ любоблагоутро́бия разве́й пле́ву дел мои́х,/ и пшени́цу даждь души́ мое́й оставле́ние,// в небе́сную Твою́ затворя́я мя жи́тницу, и спаси́ мя.
От стражи утренния до нощи, от стражи утренния, да уповает Израиль на Господа.
Позна́им бра́тие, та́инства си́лу,/ от греха́ бо ко оте́ческому до́му восте́кшаго блу́днаго сы́на/ преблаги́й оте́ц предустре́т лобза́ет,/ и па́ки своея́ сла́вы позна́ние да́рует:/ и та́инственное вы́шним соверша́ет весе́лие,/ закала́я тельца́ упита́ннаго,/ да мы досто́йно сожи́тельствуем,/ закла́вшему же человеколю́бному Отцу́ и сла́вному заколе́нию,// Спа́су душ на́ших.
Яко у Господа милость, и многое у Него избавление, и Той избавит Израиля от всех беззаконий eго.
[Стихи́ры Сретения, глас 1]:
Творе́ц вся́ческих и Изба́витель наш/ Ма́терию Де́вою в це́рковь прино́сится,/ те́мже ста́рец, Сего́ прие́м,/ с ра́достию взыва́ше:/ ны́не отпуща́еши раба́ Твоего́, Бла́же, с ми́ром,// я́коже изво́лил еси́.
Хвалите Господа вси языцы, похвалите Его вси людие.
Симео́н, на ру́ки от Де́вы прие́м/ пре́жде всех век рожде́ннаго/ Спа́са ви́дех, вопия́ше:/ просвеще́ние Твоея́ сла́вы конце́м;/ ны́не отпуща́еши раба́ Твоего́, Бла́же, с ми́ром,// я́ко ви́дех Тя днесь.
Яко утвердися милость Его на нас, и истина Господня пребывает во век.
Напосле́док веко́в рожде́на на спасе́ние челове́ков,/ Симео́н, понесы́й на рука́х Спа́са,/ ра́дуяся, вопия́ше:/ ви́дех Свет язы́ков и сла́ву Изра́иля,/ ны́не отпуща́еши, я́коже рекл еси́, я́ко Бог,// от су́щих зде веле́нием Твои́м.
Сла́ва Отцу́ и Сы́ну и Свято́му Ду́ху:
[Стихи́ра Трио́ди, глас 2]:
О коли́ких благ окая́нный себе́ лиши́х!/ О какова́ Ца́рствия отпадо́х стра́стный аз!/ Бога́тство изнури́в, е́же прия́х за́поведь преступи́х./ Увы́ мне, стра́стная душе́!/ Огню́ ве́чному про́чее осу́дишися./ Те́мже пре́жде конца́ возопи́й Христу́ Бо́гу// я́ко блу́днаго приими́ мя сы́на, Бо́же, и поми́луй мя.
И ны́не и при́сно и во ве́ки веко́в. Ами́нь:
[Догматик, глас 1]:
Всеми́рную сла́ву,/ от челове́к Прозя́бшую,/ и Влады́ку Ро́ждшую,/ Небе́сную Дверь, воспои́м Мари́ю Де́ву,/ Безпло́тных песнь, и ве́рных удобре́ние:/ Сия́ бо яви́ся Не́бо, и Храм Божества́:/ Сия́ прегражде́ние вражды́ разруши́вши,/ мир введе́, и Ца́рствие отве́рзе./ Сию́ у́бо иму́ще ве́ры Утвержде́ние,/ Побо́рника и́мамы из Нея́ Ро́ждшагося Го́спода./ Дерза́йте у́бо, дерза́йте лю́дие Бо́жии:/ и́бо Той победи́т враги́,// я́ко Всеси́лен.

Све́те Ти́хий святы́я сла́вы Безсме́ртнаго Отца́ Небе́снаго, Свята́го, Блаже́ннаго, Иису́се Христе́! Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пет бы́ти гла́сы преподо́бными, Сы́не Бо́жий, живо́т дая́й; те́мже мир Тя сла́вит.

Прокимен, глас 6: Госпо́дь воцари́ся, / в ле́поту облече́ся.
Стихи: Облече́ся Госпо́дь в си́лу, и препоя́сася
И́бо утверди́ вселе́нную, я́же не подви́жится
До́му Твоему́ подоба́ет святы́ня, Го́споди, в долготу́ дний.

Сподо́би, Го́споди, в ве́чер сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено и́мя Твое́ во ве́ки. Ами́нь. Бу́ди, Го́споди, ми́лость Твоя́ на нас, я́коже упова́хом на Тя. Благослове́н еси́, Го́споди, научи́ мя оправда́нием Твои́м. Благослове́н еси́, Влады́ко, вразуми́ мя оправда́нием Твои́м. Благослове́н еси́, Святы́й, просвети́ мя оправда́нии Твои́ми. Го́споди, ми́лость Твоя́ во век, дел руку́ Твое́ю не пре́зри. Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет. Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

СТИХИРЫ на стиховне [воскресные]:
Стра́стию Твое́ю, Христе́, / от страсте́й свободи́хомся,/ и воскресе́нием Твои́м из истле́ния изба́вихомся,// Го́споди, сла́ва Тебе́ ́. Госпо́дь воцари́ся,/ в ле́поту облече́ся.
Да ра́дуется тварь, небеса́ да веселя́тся,/ рука́ми да воспле́щут язы́цы с весе́лием:/ Христо́с бо Спас наш, на Кресте́ пригвозди́ грехи́ на́ша:/ и смерть умертви́в, живо́т нам дарова́,/ па́дшаго Ада́ма всеро́днаго Воскреси́вый,// я́ко Человеколю́бец.
И́бо утверди́ вселе́нную,/ я́же не подви́жется.
Царь сый небесе́ и земли́ непостижи́ме,/ во́лею распя́лся еси́ за человеколю́бие./ Его́же ад срет до́ле, огорчи́ся,/ и пра́ведных ду́ши прие́мша, возра́довашася:/ Ада́м же, ви́дев Тя, Зижди́теля в преиспо́дних, воскре́се./ О чудесе́! Ка́ко сме́рти вкуси́ всех жизнь;/ но я́коже восхоте́ мир просвети́ти зову́щий и глаго́лющий:// Воскресы́й из ме́ртвых, Го́споди, сла́ва Тебе́.
До́му Твоему́ подоба́ет святы́ня,/ Го́споди, в долготу́ дний.
Жены́ мироно́сицы, ми́ра нося́ща,/ со тща́нием и рыда́нием гро́ба Твоего́ достиго́ша,/ и не обре́тша Пречи́стаго Те́ла Твоего́,/ от А́нгела же уве́девша но́вое и пресла́вное чу́до,/ Апо́столом глаго́лаху:/ воскре́се Госпо́дь,// подая́ ми́рови ве́лию ми́лость.
Слава Отцу и Сыну и Святому Духу.
[Стихи́ры Триоды, глас 6]:
Оте́ческаго да́ра расточи́в бога́тство,/ с безслове́сными скоты́ пасо́хся окая́нный,/ и тех жела́я пи́щи, гла́дом та́ях не насыща́яся,/ но возврати́вся к благоутро́бному Отцу́,/ взыва́ю со слеза́ми:/ приими́ мя я́ко нае́мника// припа́дающа человеколю́бию Твоему́ и спаси́ мя.
И ныне и присно и во веки веков. Аминь.
[Стихи́ра Сретения, глас 1]:
Днесь дре́вле Моисе́ю в Сина́и зако́н пода́вый/ зако́нным повину́ется веле́нием,/ нас ра́ди, я́ко Милосе́рд, по нам быв./ Ны́не Чи́стый Бог я́ко Отроча́ Свя́то,/ ложесна́ разве́рз чи́стыя,/ Себе́ Самому́ я́ко Бог прино́сится,/ зако́нныя кля́твы свобожда́я// и просвеща́я ду́ши на́ша.

Ны́не отпуща́еши раба́ Твоего́, Влады́ко,/ по глаго́лу Твоему́, с ми́ром;/ я́ко ви́деста о́чи мои́ спасе́ние Твое́,/ е́же еси́ угото́вал пред лице́м всех люде́й,/ свет во открове́ние язы́ков,// и сла́ву люде́й Твои́х Изра́иля.

Богоро́дице Де́во, ра́дуйся,/ Благода́тная Мари́е, Госпо́дь с Тобо́ю:/ благослове́на Ты в жена́х/ и благослове́н Плод чре́ва Твоего́,// яко Спа́са родила́ еси душ на́ших. (дважды)

Тропарь Сретения Господня, глас 1:
Ра́дуйся, Благода́тная Богоро́дице Де́во,/ из Тебе́ бо возсия́ Со́лнце Пра́вды – Христо́с, Бог наш,/ просвеща́яй су́щия во тьме./ Весели́ся и ты, ста́рче пра́ведный,/ прие́мый во объя́тия Свободи́теля душ на́ших,// да́рующаго нам воскресе́ние.

Псало́м 33:
Благословлю́ Го́спода на вся́кое вре́мя,/ вы́ну хвала́ Его́ во усте́х мои́х.
О Го́споде похва́лится душа́ моя́,/ да услы́шат кро́тцыи, и возвеселя́тся.
Возвели́чите Го́спода со мно́ю,/ и вознесе́м И́мя Его́ вку́пе.
Взыска́х Го́спода, и услы́ша мя,/ и от все́х скорбе́й мои́х изба́ви мя.
Приступи́те к Нему́, и просвети́теся,/ и ли́ца ва́ша не постыдя́тся.
Сей ни́щий воззва́, и Госпо́дь услы́ша и,/ и от все́х скорбе́й его́ спасе́ и.
Ополчи́тся а́нгел Госпо́день о́крест боя́щихся Его́,/ и изба́вит их.
Вкуси́те и ви́дите, я́ко благ Госпо́дь:/ блаже́н муж, и́же упова́ет Нань.
Бо́йтеся Го́спода, вси́ святи́и Его́,/ я́ко несть лише́ния боя́щимся Его́.
Бога́тии обнища́ша и взалка́ша:/ взыска́ющии же Го́спода// не лиша́тся вся́каго бла́га.
Бог Господь, и явися нам, благословен грядый во имя Господне

Тропарь воскресный, глас 1 (дважды):
Ка́мени запеча́тану от иуде́й/ и во́ином стрегу́щим Пречи́стое Те́ло Твое́,/ воскре́сл еси́ тридне́вный, Спа́се,/ да́руяй ми́рови жизнь./ Сего́ ра́ди Си́лы Небе́сныя вопия́ху Ти, Жизнода́вче:/ сла́ва Воскресе́нию Твоему́, Христе́,/ сла́ва Ца́рствию Твоему́,// сла́ва смотре́нию Твоему́, еди́не Человеколю́бче.

СЛАВА И НЫНЕ:
Тропарь Сретения Господня, глас 1:
Ра́дуйся, Благода́тная Богоро́дице Де́во,/ из Тебе́ бо возсия́ Со́лнце Пра́вды – Христо́с, Бог наш,/ просвеща́яй су́щия во тьме./ Весели́ся и ты, ста́рче пра́ведный,/ прие́мый во объя́тия Свободи́теля душ на́ших,// да́рующаго нам воскресе́ние.


Псало́м 136:
На река́х Вавило́нских, та́мо седо́хом и пла́кахом, внегда́ помяну́ти нам Сио́на. Аллилу́иа.
На ве́рбиих посреде́ его обе́сихом орга́ны на́ша. Аллилу́иа.
Я́ко та́мо вопроси́ша ны пле́ншии нас о словесе́х пе́сней и ве́дши нас о пении. Аллилу́иа.
Воспо́йте нам от пе́сней Сио́нских. Аллилу́иа.
Ка́ко воспое́м пе́снь Госпо́дню на земле́ чужде́й? Аллилу́иа.
А́ще забу́ду тебе́, Иерусали́ме, забве́на бу́ди десни́ца моя́. Аллилу́иа.
Прильпни́ язы́к мой горта́ни моему́, а́ще не помяну́ тебе́, а́ще не предложу́ Иерусали́ма, я́ко в нача́ле весе́лия моего́. Аллилу́иа.
Помяни́, Го́споди, сы́ны Едо́мския, в день Иерусали́мль глаго́лющия: истоща́йте, истоща́йте до основа́ния его́. Аллилу́иа.
Дщи́ Вавило́ня окая́нная, блаже́н и́же возда́ст тебе́ воздая́ние твое́, е́же воздала́ еси́ нам. Аллилу́иа.

Тропари "по непорочных", глас 5:
Благословен еси, Господи, научи мя оправданием Твоим.
Ангельский собор удивися, / зря Тебе в мертвых вменившася, / смертную же, Спасе, крепость разоривша, / и с Собою Адама воздвигша, / и от ада вся свобождша.
Благословен еси, Господи, научи мя оправданием Твоим.
Почто мvра с милостивными слезами, / о ученицы, растворяете? / Блистаяйся во гробе Ангел мvроносицам вещаше: / видите вы гроб и уразумейте, / Спас бо воскресе от гроба.
Благословен еси, Господи, научи мя оправданием Твоим.
Зело рано мvроносицы течаху / ко гробу Твоему рыдающия, / но предста к ним Ангел и рече: / рыдания время преста, не плачите, / воскресение же апостолом рцыте.
Благословен еси, Господи, научи мя оправданием Твоим.
Мvроносицы жены с мvры пришедшия / ко гробу Твоему, Спасе, рыдаху, / Ангел же к ним рече, глаголя: / что с мертвыми живаго помышляете? / Яко Бог бо, воскресе от гроба.
Слава Отцу и Сыну и Святому Духу.
Поклонимся Отцу / и Его Сынови, и Святому Духу, / Святей Троице во едином существе, / с Серафимы зовуще: / Свят, Свят, Свят еси, Господи.
И ныне и присно и во веки веков. Аминь.
Жизнодавца рождши, / греха, Дево, Адама избавила еси, / радость же Еве / в печали место подала еси, / падшия же от жизни / к сей направи / из Тебе воплотивыйся Бог и Человек.

ПРОКИМЕН, глас 1: Ны́не воскресну́, глаго́лет Госпо́дь,/ положу́ся во Спасе́ние, не обиню́ся о нем.
Стих: Словеса́ Госпо́дня, словеса́ чи́ста.
Всякое дыхание / да хвалит Господа.
Стих: Хвалите Бога во святых Его, хвалите Его в утвержении силы Его.

ЕВАНГЕЛИЕ от Матфея (глава 28: 16–20) [перевод на русский язык]
В то время одиннадцать учеников пошли в Галилею, на гору, куда повелел им Иисус, и, увидев Его, поклонились Ему, а иные усомнились. И приблизившись Иисус сказал им: дана Мне всякая власть на небе и на земле. Итак идите, научите все народы, крестя их во имя Отца и Сына и Святого Духа, уча их соблюдать всё, что Я повелел вам; и вот, Я с вами во все дни до скончания века. Аминь.

Воскресе́ние Христо́во ви́девше, поклони́мся Святому Господу Иисусу, единому безгрешному. Кресту Твоему покланяемся, Христе, и святое Воскресение Твое пое́м и сла́вим. Ты бо еси Бог наш, ра́зве Тебе ино́го не зна́ем, Имя Твое имену́ем. Приидите, вси ве́рнии, поклони́мся святому Христову Воскресению; се бо прии́де Кресто́м радость всему миру; всегда́ благословя́ще Господа, пое́м Воскресение Его, распятие бо претерпе́в, смертию смерть разруши́.

СЛАВА: Покая́ния отве́рзи ми две́ри Жизнода́вче,/ у́тренюет бо дух мой ко хра́му свято́му Твоему́,/ храм нося́й теле́сный весь оскверне́н:/ но я́ко щедр, очи́сти// благоутро́бною Твое́ю ми́лостию.

И НЫНЕ: На спасе́ния стези́ наста́ви мя Богоро́дице,/ сту́дными бо окаля́х ду́шу грехми́,/ и в ле́ности все житие́ мое́ ижди́х:/ но Твои́ми моли́твами/ изба́ви мя от вся́кия нечистоты́. Поми́луй мя, Бо́же,/ по вели́цей ми́лости Твое́й,/ и по мно́жеству щедро́т Твои́х// очи́сти беззако́ние мое́. Мно́жества соде́янных мно́ю лю́тых, помышля́я окая́нный,/ трепе́щу стра́шнаго дне су́днаго:/ но наде́яся на ми́лость благоутро́бия Твоего́,/ я́ко Дави́д вопию́ Ти:/ поми́луй мя Бо́же// по вели́цей Твое́й ми́лости.
Песнь 1: Ирмос: Твоя́ победи́тельная десни́ца/ Боголе́пно в кре́пости просла́вися:/ та бо, Безсме́ртне,/ я́ко всемогу́щая, проти́вныя сотре́,// Изра́ильтяном путь глубины́ новосоде́лавшая.
Катавасия Сретения Господня, глас 3: Су́шу глубороди́тельную зе́млю / со́лнце наше́ствова иногда́: / я́ко стена́ бо огусте́ обапо́лы вода́ лю́дем пешомореходя́щим, / и богоуго́дно пою́щим: // пои́м Го́сподеви, сла́вно бо просла́вися.

Песнь 3: Ирмос: Еди́не ве́дый челове́ческаго существа́ не́мощь/ и ми́лостивно в не вообра́жся,/ препоя́ши мя с высоты́ си́лою,/ е́же вопи́ти Тебе́, Святы́й,// одушевле́нный хра́ме неизрече́нныя сла́вы Твоея́, Человеколю́бче.
Катавасия Сретения: Утвержде́ние на Тя наде́ющихся, / утверди́, Го́споди, Це́рковь, / ю́же стяжа́л еси́ // честно́ю Твое́ю Кро́вию.
Кондак Сретения, глас 1: Утро́бу Деви́чу освяти́вый Рождество́м Твои́м/ и ру́це Симео́не благослови́вый,/ я́коже подоба́ше, предвари́в,/ и ны́не спасл еси́ нас, Христе́ Бо́же,/ но умири́ во бране́х жи́тельство// и укрепи́ лю́ди, и́хже возлюби́л еси́, Еди́не Человеколю́бче.

Песнь 4: Ирмос: Го́ру Тя благода́тию Бо́жиею приосене́нную,/ прозорли́выма Авваку́м// усмотри́в очи́ма,/ из Тебе́ изы́ти Изра́илеву провозглаша́ше Свято́му,// во Спасе́ние на́ше и обновле́ние.
Катавасия: Покры́ла есть небеса́ доброде́тель Твоя́, Христе́, / из киво́та бо проше́д святы́ни Твоея́ нетле́нныя Ма́тере, / в хра́ме сла́вы Твоея́ яви́лся еси́ / я́ко младе́нец руконоси́мь, // и испо́лнишася вся́ Твоего́ хвале́ния.

Песнь 5: Ирмос: Просвети́вый сия́нием прише́ствия Твоего́, Христе́,/ и освети́вый Кресто́м Твои́м ми́ра концы́,/ сердца́ просвети́ све́том Твоего́ Богоразу́мия,// правосла́вно пою́щих Тя.
Катавасия: Я́ко ви́де Иса́иа обра́зно / на Престо́ле превознесе́на Бо́га, / от а́нгел сла́вы дориноси́ма, / о окая́нный, вопия́ше, аз: / прови́дех бо воплоща́ема Бо́га, // Све́та Невече́рня, и ми́ром влады́чествующа.

Песнь 6: Ирмос: Обы́де нас после́дняя бе́здна,/ несть избавля́яй,/ вмени́хомся, я́ко о́вцы заколе́ния,/ спаси́ лю́ди Твоя́, Бо́же наш,// Ты бо кре́пость немощству́ющих и исправле́ние.
Катавасия: Возопи́ к Тебе́ ви́дев ста́рец очи́ма спасе́ние, / е́же лю́дем прии́де от Бо́га, // Хри́сте, Ты Бог мой.
Кондак Триоди Постной, глас 3: Оте́ческия сла́вы Твоея́ удали́хся безу́мно,/ в злых расточи́в е́же ми пре́дал еси́ бога́тство./ Те́мже Ти блу́днаго глас приношу́:/ согреши́х пред Тобо́ю, О́тче ще́дрый,/ приими́ мя ка́ющася// и сотвори́ мя я́ко еди́наго от нае́мник Твои́х.

Песнь 7: Ирмос: Тебе́ у́мную, Богоро́дице, пещь/ разсмотря́ем, ве́рнии,/ я́коже бо о́троки спасе́ три Превозноси́мый,/ мир обнови́, во чре́ве Твое́м всеце́л,// хва́льный отце́в Бог и препросла́влен.
Катавасия: Тебе́ во огни́ ороси́вшаго о́троки богосло́вившия, / и в Де́ву Нетле́нну все́льшагося Бо́га Сло́ва пои́м, / благоче́стно пою́ще: // благослове́н Бог оте́ц на́ших.

Песнь 8: Ирмос: В пещи́ о́троцы Изра́илевы,/ я́коже в горни́ле, добро́тою благоче́стия чисте́е зла́та блеща́хуся, глаго́люще:/ благослови́те, вся дела́ Госпо́дня, Го́спода,// по́йте и превозноси́те во вся ве́ки.
Катавасия: Нестерпи́мому огню́ соедини́вшеся, / Богоче́стия предстоя́ще, ю́ноши, / пла́менем же неврежде́ни, / Боже́ственную пе снь поя́ху: / благослови́те, вся дела́ Госпо́дня, Го́спода // и превозноси́те во вся ве́ки.
Песнь Пресвятой Богородицы:
Величит душа Моя Господа / и возрадовася дух Мой о Бозе Спасе Моем.
Честнейшую Херувим / и славнейшую без сравнения Серафим, / без истления Бога Слова рождшую, /сущую Богородицу, Тя величаем.
Яко призре на смирение рабы Своея, / се бо, от ныне ублажат Мя вси роди. Яко сотвори Мне величие Сильный, и свято имя Его, и милость Его в роды родов боящимся Его. Сотвори державу мышцею Своею, / расточи гордыя мыслию сердца их. Низложи сильныя со престол, и вознесе смиренныя, алчущия исполни благ, и богатящияся отпусти тщи. Восприят Израиля отрока Своего, / помянути милости, / якоже глагола ко отцем нашим, / Аврааму и семени его даже до века.

Песнь 9: Ирмос: О́браз чи́стаго рождества́ Твоего́,/ огнепали́мая купина́ показа́ неопа́льная;/ и ны́не на нас напа́стей свире́пеющую угаси́ти, мо́лимся, пещь,// да Тя, Богоро́дице, непреста́нно велича́ем.
Катавасия: В зако́не се́ни и писа́ний / о́браз ви́дим, ве́рнии: / всяк му́жеский пол, ложесна́ разверза́я, свят Бо́гу. / Тем перворожде́нное Сло́во, / Отца́ Безнача́льна, / Сы́на Первородя́щася Ма́терию неискусому́жно, // велича́ем.

После канона:
СТИХИРЫ на хвалитех:Всякое дыхание да хвалит Господа. Хвалите Господа с небес, / хвалите Его в вышних. / Тебе подобает песнь Богу. Хвалите Его, вси Ангели Его, / хвалите Его, вся Силы Его. / Тебе подобает песнь Богу. Сотвори́ти в них суд напи́сан:/ сла́ва сия́ бу́дет всем преподо́бным Его́.
[Стихи́ры Воскресные]:
Пое́м Твою́, Христе́, спаси́тельную страсть,// и сла́вим Твое́ Воскресе́ние.
Хвали́те Бо́га во святы́х Его́,/ хвали́те Его́ в утверже́нии си́лы Его́.
Крест претерпе́вый, и смерть упраздни́вый,/ и воскресы́й из ме́ртвых,/ умири́ на́шу жизнь, Го́споди,// я́ко еди́н Всеси́лен.
Хвали́те Его́ на си́лах Его́,/ хвали́те Его́ по мно́жеству вели́чествия Его́.
А́да плени́вый, и челове́ка воскреси́вый,/ Воскресе́нием Твои́м, Христе́,/ сподо́би нас чи́стым се́рдцем// Тебе́ пе́ти и сла́вити.
Хвали́те Его́ во гла́се тру́бнем,/ хвали́те Его́ во псалти́ри и гу́слех.
Боголе́пное Твое́ снисхожде́ние сла́вяще,/ пое́м Тя, Христе́./ Роди́лся еси́ от Де́вы,/ и не разлуче́н был еси́ от Отца́,/ пострада́л еси́, я́ко челове́к,/ и во́лею претерпе́л еси́ Крест,/ воскре́сл еси́ от гро́ба, я́ко от черто́га произше́д,/ да спасе́ши мир,// Го́споди сла́ва Тебе́.
Глас 6: Хвали́те Его́ в тимпа́не и ли́це,/ хвали́те Его́ во стру́нах и орга́не.
[Стихи́ры Сре́тения]:
Восприими́, рече́, Симео́не, Зижди́теля вся́ческих рука́ми:/ о ста́рче, подыми́ Христа́,/ Его́же Де́ва Отрокови́ца роди́ без се́мене// на ра́дость ро́ду на́шему.
Хвали́те Его́ в кимва́лех доброгла́сных, хвали́те Его́ в кимва́лех восклица́ния. / Вся́кое дыха́ние да хва́лит Го́спода.
Зако́ну Творца́ и Бо́га,/ Его́же трепе́щут А́нгельская мно́жества,/ соше́дшеся, воспои́м, лю́дие, Еди́наго Благоде́теля и зако́ну Законода́теля// во спасе́ние душ на́ших.
Ны́не отпуща́еши раба́ Твоего́, Влады́ко,/ по глаго́лу Твоему́, с ми́ром.
Ны́не отпуща́еши, Влады́ко, раба́ Твоего́,/ я́коже рекл еси́, с ми́ром,/ я́ко ви́дех Тя, Христе́, Све́та Первове́чнаго,/ соу́з мя плотски́х,// во открове́ние язы́ков и Изра́илю.
Глас 2: Свет во открове́ние язы́ков/ и сла́ву люде́й Твои́х Изра́иля.
Свяще́ннаго Свяще́нная Де́ва принесе́ во святи́лище святи́телю,/ просте́р же ру́це Симео́н прия́т Сего́, ра́дуяся,/ и возопи́: ны́не отпуща́еши раба́ Твоего́, Влады́ко,// по глаго́лу Твоему́, с ми́ром, Го́споди.
Сла́ва Отцу́ и Сы́ну и Свято́му Ду́ху.
[Стихи́ра Триоди Постной, глас 6]:
О́тче Благи́й, удали́хся от Тебе́, не оста́ви мене́,/ ниже́ непотре́бна покажи́ Ца́рствия Твоего́:/ враг вселука́вый обнажи́ мя и взят мое́ бога́тство,/ душе́вная дарова́ния блу́дно расточи́х./ Воста́в у́бо обра́щься к Тебе́ вопию́:/ сотвори́ мя я́ко еди́наго от нае́мник Твои́х,/ мене́ ра́ди на Кресте́ пречи́стеи Твои́ ру́це простры́й,/ да лю́таго зве́ря исхити́ши мя,/ и в пе́рвую оде́жду облече́ши мя,// я́ко еди́н Многоми́лостив.
И ныне и присно и во веки веков. Аминь. [Глас 2]:
Преблагослове́нна еси́, Богоро́дице Де́во,/ Вопло́щшим бо ся из Тебе́ ад плени́ся,/ Ада́м воззва́ся,/ кля́тва потреби́ся,/ Е́ва свободи́ся,/ сме́рть умертви́ся, и мы ожи́хом./ Тем воспева́юще вопие́м:/ благослове́н Христо́с Бог,// благоволи́вши та́ко, сла́ва Тебе́.

Стихи́ра ева́нгельская первая, глас 1: Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
На го́ру ученико́м иду́щим за земно́е вознесе́ние,/ предста́ Госпо́дь, и поклони́вшеся Ему́,/ и да́нныя вла́сти везде́ научи́вшеся,/ в поднебе́сную посыла́хуся/ пропове́дати е́же из ме́ртвых воскресе́ние,/ и е́же на небеса́ возше́ствие:/ и́мже и во ве́ки спребыва́ти нело́жный обеща́ся Христо́с Бог,// и Спас душ на́ших.
1-й антифон:
Благослови, душе моя, Господа, Благословен еси, Господи.
Благослови, душе моя, Господа, и вся внутренняя моя, имя святое Его.
Благослови, душе моя, Господа, и не забывай всех воздаяний Его.
Очищающаго вся беззакония твоя, исцеляющаго вся недуги твоя.
Избавляющаго от истления живот твой, венчающаго тя милостию и щедротами.
Исполняющаго во благих желание твое: обновится яко орля юность твоя.
Щедр и милостив Господь, долготерпелив и многомилостив.
Благослови, душе моя, Господа, и вся внутренняя моя, имя святое Его.
Благословен еси, Господи.

2-й антифон:
Хвали, душе моя, Господа. Восхвалю Господа в животе моем, пою Богу моему, дондеже есмь.
Не надейтеся на князи, на сыны человеческия, в них же несть спасения.
Изыдет дух его, и возвратится в землю свою: в той день погибнут вся помышления его.
Блажен, емуже Бог Иаковль помощник его, упование его на Господа Бога своего,
сотворшаго небо и землю, море и вся, яже в них;
хранящаго истину в век, творящего суд обидимым, дающаго пищу алчущим.
Господь решит окованныя; Господь умудряет слепцы;
Господь возводит низверженныя; Господь любит праведники;
Господь хранит пришельцы, сира и вдову приимет, и путь грешных погубит.
Воцарится Господь во век. Бог твой, Сионе, в род и род.
Единородный Сыне, и Слове Божий, безсмертен Сый, и изволивый спасения нашего ради воплотитися от святыя Богородицы и Приснодевы Марии, непреложно вочеловечивыйся, распныйся же Христе Боже, смертию смерть поправый, Един Сый Святыя Троицы, спрославляемый Отцу и Святому Духу, спаси нас.

Блаженны:
Во Царствии Твоем помяни нас, Господи, егда приидеши во Царствии Твоем.
Блажени нищии духом, яко тех есть Царство Небесное.
Блажени плачущии, яко тии утешатся.
Блажени кротцыи, яко тии наследят землю.
Блажени алчущии и жаждущии правды, яко тии насытятся.
Блажени милостивии, яко тии помиловани будут.
Блажени чистии сердцем, яко тии Бога узрят.
Блажени миротворцы, яко тии сынове Божии нарекутся.
Блажени изгнани правды ради, яко тех есть Царство Небесное.
Блажени есте, егда поносят вам, и ижденут, и рекут всяк зол глагол на вы лжуще, Мене ради
Радуйтеся и веселитеся, яко мзда ваша многа на небесех.

Во время малого входа с Евангелием:
Приидите, поклонимся и припадем ко Христу.
Спаси ны, Сыне Божий, воскресый из мертвых, поющия Ти: Аллилуия.

Тропа́рь воскре́сный, глас 1:
Ка́мени запеча́тану от иуде́й/ и во́ином стрегу́щим Пречи́стое Те́ло Твое́,/ воскре́сл еси́ тридне́вный, Спа́се,/ да́руяй ми́рови жизнь./ Сего́ ра́ди Си́лы Небе́сныя вопия́ху Ти, Жизнода́вче:/ сла́ва Воскресе́нию Твоему́, Христе́,/ сла́ва Ца́рствию Твоему́,// сла́ва смотре́нию Твоему́, еди́не Человеколю́бче.

Тропа́рь пра́здника Сретения Господня, глас 1:
Ра́дуйся, Благода́тная Богоро́дице Де́во,/ из Тебе́ бо возсия́ Со́лнце Пра́вды – Христо́с, Бог наш,/ просвеща́яй су́щия во тьме./ Весели́ся и ты, ста́рче пра́ведный,/ прие́мый во объя́тия Свободи́теля душ на́ших,// да́рующаго нам воскресе́ние.

Кондак Трио́ди Постной, глас 3:
Оте́ческия сла́вы Твоея́ удали́хся безу́мно,/ в злых расточи́в е́же ми пре́дал еси́ бога́тство./ Те́мже Ти блу́днаго глас приношу́:/ согреши́х пред Тобо́ю, О́тче ще́дрый,/ приими́ мя ка́ющася// и сотвори́ мя я́ко еди́наго от нае́мник Твои́х.

Конда́к Сре́тения, глас 1:
Утро́бу Деви́чу освяти́вый Рождество́м Твои́м/ и ру́це Симео́не благослови́вый,/ я́коже подоба́ше, предвари́в,/ и ны́не спасл еси́ нас, Христе́ Бо́же,/ но умири́ во бране́х жи́тельство// и укрепи́ лю́ди, и́хже возлюби́л еси́, Еди́не Человеколю́бче.

Прокимен, глас 1: Бу́ди, Го́споди, ми́лость Твоя́ на нас,/ я́коже упова́хом на Тя.
Стих: Ра́дуйтеся, пра́веднии, о Го́споде, пра́вым подоба́ет похвала́.
Прокимен, глас 3: Вели́чит душа́ Моя́ Го́спода,/ и возра́довася дух Мой о Бо́зе Спа́се Мое́м.

К Коринфянам первое послание святого апостола Павла (гл.6: 12–20)
Братия, все мне позволительно, но не все полезно; все мне позволительно, но ничто не должно обладать мною. Пища для чрева, и чрево для пищи; но Бог уничтожит и то и другое. Тело же не для блуда, но для Господа, и Господь для тела. Бог воскресил Господа, воскресит и нас силою Своею. Разве не знаете, что тела ваши суть члены Христовы? Итак отниму ли члены у Христа, чтобы сделать их членами блудницы? Да не будет! Или не знаете, что совокупляющийся с блудницею становится одно тело с нею? ибо сказано: два будут одна плоть. А соединяющийся с Господом есть один дух с Господом. Бегайте блуда; всякий грех, какой делает человек, есть вне тела, а блудник грешит против собственного тела. Не знаете ли, что тела ваши суть храм живущего в вас Святого Духа, Которого имеете вы от Бога, и вы не свои? Ибо вы куплены дорогою ценою. Посему прославляйте Бога и в телах ваших и в душах ваших, которые суть Божии.

ЕВАНГЕЛИЕ от Луки (гл.15: 11–32) – О БЛУДНОМ СЫНЕ
Сказал Господь притчу сию: у некоторого человека было два сына; и сказал младший из них отцу: отче! дай мне следующую мне часть имения. И отец разделил им имение. По прошествии немногих дней младший сын, собрав всё, пошел в дальнюю сторону и там расточил имение свое, живя распутно. Когда же он прожил всё, настал великий голод в той стране, и он начал нуждаться; и пошел, пристал к одному из жителей страны той, а тот послал его на поля свои пасти свиней; и он рад был наполнить чрево свое рожками, которые ели свиньи, но никто не давал ему. Придя же в себя, сказал: сколько наемников у отца моего избыточествуют хлебом, а я умираю от голода; встану, пойду к отцу моему и скажу ему: отче! я согрешил против неба и пред тобою и уже недостоин называться сыном твоим; прими меня в число наемников твоих. Встал и пошел к отцу своему. И когда он был еще далеко, увидел его отец его и сжалился; и, побежав, пал ему на шею и целовал его. Сын же сказал ему: отче! я согрешил против неба и пред тобою и уже недостоин называться сыном твоим. А отец сказал рабам своим: принесите лучшую одежду и оденьте его, и дайте перстень на руку его и обувь на ноги; и приведите откормленного теленка, и заколите; станем есть и веселиться! ибо этот сын мой был мертв и ожил, пропадал и нашелся. И начали веселиться. Старший же сын его был на поле; и возвращаясь, когда приблизился к дому, услышал пение и ликование; и, призвав одного из слуг, спросил: что это такое? Он сказал ему: брат твой пришел, и отец твой заколол откормленного теленка, потому что принял его здоровым. Он осердился и не хотел войти. Отец же его, выйдя, звал его. Но он сказал в ответ отцу: вот, я столько лет служу тебе и никогда не преступал приказания твоего, но ты никогда не дал мне и козлёнка, чтобы мне повеселиться с друзьями моими; а когда этот сын твой, расточивший имение своё с блудницами, пришел, ты заколол для него откормленного теленка. Он же сказал ему: сын мой! ты всегда со мною, и всё мое твое, а о том надобно было радоваться и веселиться, что брат твой сей был мертв и ожил, пропадал и нашелся.

Версия для печати

Тэги: Великий пост